MHA-in J&K-a ralmuan chhoh mek thu tarlang

Ministry of Home Affairs (MHA) chuan dan leh thupek kenkawh ṭhat avangin Kashmir chu a ralmuan chhoh mek thu nimin khan Lok Sabha inkhawmah a puang.

Parliament Winter Session neih mekah BJP MP Kanakmal Ka­tara chuan Kashmir-ah boruak muanawm a awm tawh leh tawh loh  zawtin, minister of state for home affairs G. Kishan Reddy chuan August 5 aṭanga November 15 thleng khan lunga invawm chungchang kaihhnawihah case 190-ah mi 765 man an nih tawh thu house-ah hian a sawi. 

Kumin January 1 aṭanga August 4 thleng khan lunga invawm chung­changah mi 361 thubuai siamsak an nih thu a tarlang bawk. Buai­na a chhuah changa lung­awi lote'n lunga invawm an chin ṭhin avang hian Reddy chuan sorkarin venhmin hna hrang hrang a thawh thu leh hemi tih ziaawm a nih theihnan sorkar chuan Public Safety Act (PSA) hnuaiah hma a lak thu a sawi. Jammu and Kashmir-a India lak aṭanga inlakhran duhtu pawl, Hurriyat-te hi lunga invawm ching chhuaktuah a puh bawk.

Thla ruk liam ta chhung khan J&K-ah hian khualzin 34,10,219 an kal thu leh chung zinga mi 12,934-te chu ramdang mi an nih thu a tarlang a, heng khualzinte aṭanga an sum hmuh hi cheng vaibelchhe 25.12 a ni tih a sawi bawk.

Sorkar laipuiin Au­gust 5-a J&K special status a hlihsak hnu khan silai hman a ni em, tih zawhna chu Reddy chuan silai kahpuah a nih loh thu leh, mipuite thunun theih zawk nan lek lan erawh a nih thuin a chhang. J&K hi August 5-a Parliament-in Jammu and Kashmir Reorganisation Act a pass hnuah J&K special status hlihsak a ni a, chumi hnuah Union Territory pahniha ṭhen zui a ni.