Loneitute 'Bharat Bandh' huaihawt tum Congress Party-in loneitute a thlawp

Congress chuan nimin khan thuchhuah siamin loneitu pawlte'n December 8-a 'Bharat Bandh' huaihawt an tum chu an thinlung takin an thlawp tih an tarlang. 

Farm law thar duh loa nawrh huaihawt mek loneitute bandh huaihawt tur thlawpna lantirna atan hian an band huaihawt niah an district headquarter zawng zawngah leh state head quarter-ahte nilengin duh lohna an lo lantir ve dawn tih an sawi.

Sorkar laipui dan thar siam duh lo hian loneitu tam takte chu Delhi ramri velah November 26 aṭang khan nawrh huaihawtin an awm tawh a, naktuk December 8 hian rampum huap bandh huaihawt an tum a ni.

AICC headquarters-ah thuthar thehdarhtute hnenah Congress thupuangtu Pawan Khera chuan loneitute an thlawp thu hi sawiin an party chief ṭhin Rahul Gandhi chuan tractor rally hmangtein signature campaign-te a lo kalpui tawh bakah Kisaan Rally kaltlangtein loneitute tana aw an chhuah tawh thu hi a sawi a ni. 

"Kan district heaquarters tinah leh Pradesh headquarters-ahte chuan bandh hi kan thlawp dawn a, bandh hi a hlawhtlin theihna turin duh lohna kan lo lantir ve dawn a ni," a ti.

Loneitute hian sorkar laipuiin tunhnaia bill a pawm thar Farmers (Empowerment and Protection) Agreement of Price Assurance and Farm Services Act, 2020; Farmers Produce Trade and Commerce (Promotion and Facilitation) Act, 2020; leh The Essential Commodities (Amendment) Act 2020 duh loin bandh hi huaihawt an tum a ni. 

AAP : Delhi chief minister Arvind Kejriwal chuan nimin khan Aam Aadmi Party (AAP) pawhin loneitute bandh huaihawt tur chu an thlawp dawn thu a sawi.

"AAP chuan loneitu pawlte'n December 8-a Bharat Bandh an huaihawt tur hi a thlawp dawn a ni. Loneitute'n ramchhung hmun hrang hranga tharum thawh lo zawnga duh lohna an lantirna turah AAP volunteer-te chu an tel ve dawn a ni," tiin Kejriwal chuan a tweet a ni. 

TRS : Telangnaa-a rorellai, Telanga Rashtra Samithi (TRS) pawhin Bharat Bandh hi an thlawp dawn tih nimin kan party leh chief minister K Chandrasekhar Rao chuan a sawi. CM chuan Telangana-ah he bandh huaihawt hi hlawhtling taka neih a nih ngei theihna tura theihtawp chhuah turin an party worker-te a sawm.  

SAD : Shiromani Akali Dal (SAD) pawhin loneitute hi an thlawp dawn tih sawiin, nimin khan Maharashtra c hief minister Uddhav Thackeray an hmu. CM pawh hian loneitute thil tih tur hi a thlawp dawn tih a lo hrilh ve bawk a ni. 

Trinamool Congress : West Bengal-a rorellai, Trinamool Congress chuan December 8-a ram pum huapa bandh huaihawt tur chu an thlawp tih sawiin, an party bik loneitute thlawpna lantirin December 8, 9 leh 10-ah sit-in protest huaihawt an tum tih an sawi. 

Left Party : Communist Party of India (Marxist), Communist Party of India, Communist Party of India (Marxist-Leninist), Revolutionary Socialist Party leh All India Forward Bloc-te pawhin thuchhuah inṭawm siamin, loneitu pawlten Farm Law duh lohna lantira nawrh an huaihawt mek chu an thlawp thu leh, Bharat Bandh huaihawt an tum pawh an thlawp thu an sawi a ni.