Parliament building thar tur lungphum PM-in phum dawn

Prime minister Narendra Modi chuan December 10 hian Parliament building thar tur lungphum a phum dawn.

Lungphum phum ceremony-ah hian party zawng zawng aiawh an tel dawn a, ceremony hi virtual-a buatsaih tur niin party hruaitu hrang hrangte hi a ṭhen chu a hmunah an kal dawn laiin ṭhenkhat chuan video kaltlangin an chhim ve mai dawn a ni. 

Lok Sabha Speaker Om Birla chuan Inrinni khan hemi chungchang hi sawi langin," Building hluiah khan zalenna kawng kan zawh ṭan a, chuta ṭanga kum 75 a liam hnuah chuan House session pahnih chu Parliament building tharah kan nei tawh dawn a ni...Brick leh lung hmanga sak building a ni mai dawn lo a, mipui vaibelchhe 130-te duhthusam tihhlawhtlinna tur a ni," a ti.

"Tuna Parliament building kan hman mek hi kum 100 a ni tawh dawn a, ramchhunga cheng mi vaibelchhe 130-te zahawmna turin Atmanibhar Bharat entirna turin building thar hi sak a ni dawn. Prime minister Narendra Modi chuan December 10 chawhnu dar 1-ah bhoomu pujan a ti dawn a ni," tiin a sawi bawk.

Building thar lungphum phum tur hian Inrinni khan Speaker hian Prime Minister hi hmuin official-in a sawm a ni.

Parliament building tharah hian Lok Sabha chamber-ah sear 888 a awm dawn a, Rajya Sabha chamber-ah seat 384 a awm dawn bawk Joint session neih hunah chuan Lok Sabha chamber-ah hian mi 1224 an awm thei dawn a, mahse building tharah hian Cental Hall a awm dawn lo thung. 

Sq ft 63,500 a zau a ni dawn a, a sakna atan hian Rs vbc 971 hisap niin speaker chuan a saknaah hian mi 2,000 vel direct-a an inrawlh dawn laiin mi 9,000 vel chu indirect-in an inrawlh dawn thung a ni, a ti. Ramchhung hmun hrang hrang aṭangin artist 200 vel building thar saknaah hian an tel dawn bawk.