Shiv Sena, NCP leh Congress thawkho 'Maha Vikas Aghadi' ti dawn

Maharashtra-ah ṭangrual sorkar siam tum, Shiv Sena, Nationalist Congress Party leh Congress party thawkho chu 'Maha Vikas Aghadi' tih a ni dawn. 

Party pathumte hian ṭang­rual sorkar siam tumin hma a la mek a, inremna pawh an siam thei tawh nia sawi a ni. An pathum zinga seat la hnem ber, Shiv Sena hian term pumin Chief Minister post an chang anga, NCP leh Congress hian deputy chief minister pakhat ve ve an nei bawk ang. 

Congress Working Commi­­ttee chu nimin khan ṭhukhawm­in, NCP leh Shiv Sena nena ṭangrual sorkar siam hi a thu­phung chuan an pawm tawh nia sawi a ni. He meeting hi party president Sonia Gandh-i'n a kaihruai a ni. Meeting zawh hnuah chanchinthar lakhawmtute a kawmnaah, Congress general secretary KC Venjugopal chuan NCP nena sawiho tur an la neih thu leh, Shiv Sena thawhpui tur chungchanga thutlukna chu vawiin hian an tihfel tawh tur thu a sawi. 

Party pathum hruaitute hian thawhhona tura inremna an siamfel hnuah, Inrinni hian Governor Bhagat Singh Koshyari hmuh an tum a ni. Shiv Sena chuan Congress leh NCP nena an thawhho theihna turin a 'Hindutva' agenda chu tihtawp a, secular party anga awm a remti a ni. Shiv Sena hian a hmain Hindutva agenda hi kalpuiin, Ram Temple sak, Article 370, Triple Talaq leh thil dangah pawh BJP chu a lo thlawp tawh ṭhin. Mahse heng issue an buaipuite hi party hruaitu Uddav Thackeray chuan tawpsan a remti. Shiv Sena MLA-te hian vawiinah Thackeray chenna inah meeting an nei ang. 

October-a Maharashtra assembly inthlanah khan Shiv Sena leh BJP-te thawkdunin, NCP leh Congress hi an thawk­dun bawk. Shiv Sena-BJP thawkdun hian sorkarna siam thei turin member pawh an ngah tawk a ni. Mahse ṭangrual sorkar siam turah hian Shiv Sena chuan chanpual inzata insem a, Chief Minister post pawh inchelh chhawk a phût a, hei hi BJP lamin a pawmpui theih loh avangin Shiv Sena hian an thawhdunna hi a titawp a ni. Sorkar laipuia Shiv Sena minister awmchhun pawh a lo bang tawh bawk. 

Maharashtra assembly, seat 288 awmnaah hian BJP chu party mala member ngah ber niin member 105 a nei a, Shiv Sena hian member 56 neiin, NCP-in member 54 leh Congress-in 44 a nei a ni.