CISF-in sipai bang mi nuai 1.2 chhawr leh tum

Central Industrial Security Force (CISF) chuan defence leh Central Armed Police Forces (CAPFs) sipai bang mi nuai 1.2-te chhawr leh a tum. 

Ministry of Home Affairs hnuaia awm, CISF hian sipai bangte chhawr leh dan tur hi a buaipui mek. CISF Director-General chuan Inspector General (IG) zawng zawng hnenah, private sector hnuaia industry liana CISF-te dah theihna tur leh sipai an mamawh zat turte enfiah tura hrilhin, report thehlut turin a hriattir. 

CISF hnuaiah hian sipai 1,80,000 awm mekin, hei hi 3,00,000-ah tihpun rawtna a awm a, hemi bakah hian Reserve Battalion 16 siam belh rawtna pawh MHA-ah hian thehluh a ni tih tarlan a ni. September 23 khan union home minister Amit Shah hoin CISF chungchang hi ngaihtuah a ni a, hetah hian defence hnuai leh CAPF sipaia lo ṭang tawhte chu CISF-ah hian kum 5 chhung atan lak belh rawt a ni. A ṭhen chu chhawr lailawk anga lak tur an ni a, a ṭhen erawh thawk nghet tura lak tum an ni.