Mamata leh Owaisi-te'n NRC thlawp lo
West Bengal chief minister Mamata Banerjee leh All India Majlis-e-Ittehadul Muslimeen (AIMIM) president Asaduddin Owaisi-te chuan India rampuma National Register of Citizens (NRC) kalpui tum chu an sawisel.
Union home minister Amit Shah-a'n India ram pumah NRC kalpui a nih tur thu Parliament-a a sawi chu chhang nghalin, Bengal CM chuan a kaihhruai sorkar chuan West Bengal-ah NRC kalpui a remti ngai dawn lo tih a sawi. NRC chu prime minister hlui Rajiv Gandhi hunlaia Assam Accord an siamah Assam bika kalpuia an tih a ni a, ram pumah kalpui theih a ni lo ang, a ti.
Murshidabad district-a public meeting a neihah hei hi sawiin, Mamata chuan August 31-a Assam-a NRC final list tihchhuahah mi nuai 19 zet hmaih an nih tih sawiin, an zingah hian India khua leh tui dik tak tam tak an tel thu a sawi. NRC list-a an tel loh vangin detention centre-ahte dah an ni a, hetiang hi Bengal-ah chuan thlentir an tum ve lo tih a sawi. NRC final list-a tel lo, Hindu leh Bengali nuai 14 zet an awm theihna chhan sawifiah turin BJP a phut bawk. Bengal CM chuan, mi ṭhenkhatin boruak ṭha lo siam tumin an state-ah NRC kalpui a ni dawn tiin an sawi a, hei hian mipuite pawh a tichiai phah tih a sawi.
AIMIM president leh Hyderabad MP Asaduddin Owaisi pawhin NRC kalpui chuan mipuite tana harsatna siam bak engmah a thlen dawn lo tih a sawi bawk. Oawdi chuan a twitter-ah, prime minister Narendra Modi chuan India mi zawng zawngte chu in tlar tir a, document nei mumal lo te chu hren beh a, hnam leh sakhaw tlem leh mi chak lo zawkte chu thiltithei zawkte zahngaihna hnuaia kuntir leh a tum a ni. Hetianga thil buaithlak tak hmachhawn tur hian khawvel ram dangten an mi leh sate an dah ngai lo, a ti.