Cabinet-in purunsen lakluh remti

Nilainia Cabinet ṭhukhawm chuan ramdang aṭang purunsen ton maktaduai 1.2 lakluh a remti.

Ram chhunga purunsen tharchhuah indaih tawk loh phuhruk nan leh, purunsen man sang zel venna turin cabinet hian ramdang aṭanga lakluh hi a remti a ni. Cabinet meeting zawhah finance minister Nirmala Sitharaman chuan thuthar lakhawmtute hmaah cabinet thutlukna hi a sawichhuak a ni.  

Food and Consumer Affairs Minister Ram Vilas Paswan chuan Nov 16 khan Metals and Minerals Trading Corporation of India (MMTC) kaltlangin, purunsen  ton 1,00,000 chu ramdang aṭanga lakluh a nih tur thu a lo sawi tawh a, hemi hma hian purun ton 4,000 leina turin tender pawh tihchhuah a lo ni tawh bawk. 

Ram pumah purunsen man hi a to chho zel a, November 15 aṭang khan purun sen man hi kg khatah  Rs 60.38 a ni tawh.  Nikum tun ang hunah khan kg khat Rs 22.84 a ni thung. Kumin hian purun thar chhuah hi ton maktaduai 52.06-in a tla hniam a, chu chu tharchhuah tura beisei  aṭanga  26% a ni. Hei vang hian India rampumah purun indaih tawk lohna a nasain, a man pawh a san phah a ni.