Tractor rally neih tum chungchangah SC-in thupek a tichhuak dawn lo
Supreme Court chuan farm law duh lohna lantira nawrh huaihawt mek, loneituten Republic Day nia Delhi-a tractor rally neih an tum chungchangah thupek engmah tihchhuah a tum lo a, Delhi police-te kutah thutlukna a dah fel.
Delhi ramria hun rei tak nawrh huaihawt tawh, loneitute chuan an thil phut chungchanga sorkar laipui nena an inbiakna a hlawhchham zel avangin, January 26 hian an lungawi lohna lantir nan Delhi khawpui chhungah tractor rally pui tham tak huaihawt an tum a ni.
Tractor rally neih tum chungchangah hian sorkar laipui chuan Supreme Court-ah ngenna thehlutin, loneitute thil tum hi lo dan sak tura thupek tichhuak turin a ngen a ni. Mahse Supreme Court chuan dan leh thupek kaihhnawih thil a ni tiin, he rally buatsaih tura thutlukna chu Delhi police-te siam turin a ti a, sorkar laipui pawh ngenna a thehluh chu sut leh turin a ti bawk.
Nimina Supreme Court bench hi sorkar laipui ngenna thehluh a ngaihtuah nawn leh naah, "Rally leh punkhawmna dang engpawh keiniin lo phalsak emaw, lo khapsak emaw chu tihphung a ni loin kan hria a ni. Hei chu police-te kut tur a ni a, anni in an ngaihtuah zawk ang. Keini chuan eng thupek mah kan tichhuak dawn lo a ni," a ti.
Hemi chungchang hi Thawhṭanni khan chief justice of India Sharad Arvind Bobde kaihhruai, judge pathum awmna bench chuan a lo ngaihtuah tawh a ni. Hemi ṭum pawh hian CJI chuan khawpui chhunga luh phal leh phal loh chungchang chu law and order kaihhnawih a nih avangin police-te buaipui zawk tur a nih thu a lo sawi tawh a ni.
Hetih lai hian loneitu pawl aiawhte chuan tractor rally neih an tum hi boruak ṭha tak hnuaia kalpui a nih dawn thu leh, Rajpath-a Republic Day parade neih tihbuai a nih dawn lo thu an sawi. Loneitute chu tractor rally nei tur hian an inbuatsaih ṭan mek a, Punjab leh Haryana-a loneitu sang telte chuan rally-a tel tur hian Delhi an pan dawn.
Farm law chungchangah loneitu leh sorkar laipui aiawhte chu ṭum eng emaw zat inbiakna nei tawh mah se tun thlengin inremna an la siam thei lo. Supreme Court chuan he dan thar hi hman theih loh turin a dang rih bawk a ni. Inremna an siam theihna tura hma la turin member pali awmna committee a din bawk.