Jan 30-ah all party meeting nei dawn

Prime minister Narendra Modi kaihhruaiin January 30 hian all-party meeting neih a ni dawn. Meeting hi virtual-a neih a ni ang. 

Parliament session tluang taka neih a nih theihna tura inbuatsaih lawk nan session ṭan hma hian all-party meeting hi neih a ni ṭhin. Mahse kuminah erawh chuan January 29-ah session ṭan a ni dawn a, session ṭan hnuah all-party meeting hi neih a ni dawn thung a ni. 

Parliamentary affairs minister Pralhad Joshi chuan meeting-ah hian sorkar chuan legislative agenda te a tarlang dawn a, eptu pawlte rawtna neihte pawh a ngaihthlak sak dawn a ni, a ti. Budget session hi January 29 aṭanga neih a ni dawn a, session hi thawh hniha neih a ni ang. A thawh khatna hi January 29-February 15 chhung neih niin, a thawh hnihna chu March 8-April 8 chhungin neih a ni ang. Session chhung hian House pahnihte chuan ro an inrel chhawk dawn a, chawhma lamah Rajya Sabha lamin rorelin chawhnu lamah Lok Sabha lam an ṭhukhawm ṭhin dawn a ni. 

Session ṭan hmain MP zawng zawng chu coronavirus hri an kai leh kai loh, RT-PCR test neih hmasak vek an ni ang. Session chhung hian sorkar laipuin Covid-19 hri leng laka inkaihhruaina a siamte pawh zawm a ni dawn tih Lok Sabha speaker Om Birla chuan a sawi.