Maha : Vawiinah Supreme Court-in thutlukna siam dawn

Maharashtra-a hman­hmawh taka BJP kaihhruai sorkar lakluh a nih chungchanga eptu pawl, Shiv Sena, Nationalist Congress Party (NCP) leh Congress party-in Supreme Court-a petition thehlut a, sorkar fiah an phutna chu vawiinah court in a ngaihtuah dawn. 

BJP-in sorkarna a siam theih loh thu Governor Bhagat Singh Koshyari hnenah a hrilh hnuah, Shiv Sena, NCP leh Congress party ten ṭangrual sorkar siam tumin inbiakna an nei a, Inrinni-a sorkar an siam theih thu hrilh a Governor hmuh an tum laiin, puanzar lawk loin Inrinni zing khan Governor chuan BJP hruaitu Devendra Fadnavis chu chief minister leh, NCP hruaitu Ajit Pawar chu deputy chief minister atan a lalut a ni. Inrinni zing dar 5.47 khan Maharashtra-a President's Rule puan chu tihtawp thut niin, a hnu lawk zing dar 7:50 ah CM leh deputy CM te hi lakluh nghal an ni. 

Fadnavis chuan BJP kaihhruai sorkar siam hi NCP MLA 54 ten an thlawp vek tih a sawi a, hetihlai hian NCP hotu lu ber, Sharad Pawar chuan an party MLA hel tlemte chauhin BJP an thlawp niin a sawi thung. NCP MLA meeting chuan Ajit Pawar hi legislature party leader a nihna aṭangin an ban nghal bawk. Eptute chuan Governor thiltih dan chu an dem thu sawi bawkin, Governor office zahawmna tichhiaah an puh. 

Eptu party pathumten Fadnavis kaihhruai sorkar chuan thlawptu a ngah tawk lo nia sawiin, House-a fiah nghal an phut. Mahse Supreme Court chuan an ngenna hi a pawmsak lo a, vawiin chawhma dar 10:30 thleng Maharashtra sorkar thar hi hun a la pe. 

Supreme Court chuan eptu party-ten petition an thehluh behchhanin, Maharashtra CM chu a kaihhruai sorkar thlawptu MLA list pe tur leh, Governor-in sorkar siam tura a kohna lehkhate pe turin Pathianni khan a hrilh. Nimin khan BJP leh Fadnavis aiawha court-a inlan, attorney general Mukul Rohatgi chuan BJP kaihhruai sorkar hian thlawptu MLA 170 nei niin a sawi. BJP MLA 105 leh NCP MLA 54 te bakah, independent MLA 11-ten an thlawp niin a sawi. 

Governor aiawha ding, solicitor general Tushar Mehta pawhin Ajit Pawar hian BJP kaihhruai sorkar thlawptu, NCP MLA 54-te hming leh an signature te chu Governor hnenah hian a thehlut a, hemi hnu hian Governor hian Fadnavis hi sorkar siam turin a sawm ta a ni, a ti bawk. 

Hetih lai hian Shiv Sen-NCP-Congress ṭangrual pawl chuan  thlawptu MLA 154 an nei tih sawiin, Supreme Court-ah affidavit an thehlut ve bawk. Ṭangrual pawl thlawptute hi Shiv Sena MLA 56, NCP MLA 48, Congress MLA 44 leh independent MLA paruk an nih thu an tarlang. Party pathumte hian an MLA-te chu Mumbai airport bula hotel-ah an khungkhawm mek a ni. 

Nimina Lok Sabha inkhawm chu Maharashtra state chungchang avanga member-te in auhbuai vangin ṭum hnih tihtawp a ni. House chhungah Congress member pahnih, Hibi Eden leh TN Prathapan-te chuan, 'Democracy tihhlum a ni ta', 'Constitution chhanhim a ngai', 'Demo­cracy chhanhim a ngai' tih thuziakte an keng lut a, Speaker chuan House aṭanga hruaichhuak turin marshal-te a hriattir a ni. 

Congress MP pahnihte House aṭanga chhuahtir tum chu an party MP dangte chuan lo chhanin, marshal-te chu an lo dang a, hei vang hian inkhawm tihtawp lailawk a ni. A hnua rorel inkhawm chhunzawm leh a nih pawhin, Congress member-te chu Speaker podium bulah kalkhawmin an au  buai zui leh a, inkhawm pawh tihtawp a ngaih leh phah bawk.