Sinha leh a hote Srinagar chhuahsan phal lo

Union Finance Minister hlui leh BJP hruaitu hlui Yashwant Sinha kaihhruai mi pangate chuan kar kal ta Inrinni khan Kashmir tlawhin, police-te chuan Srinagar chhuahsan an phallo.

"Srinagar district bak hi tlawh leh chhuahsan an phal lo a, Pathianni khan Pulwama leh Shopian tlawh kan tum a, mahse police-te chuan rem an ti lo. Chuvang chuan kan hmuh tum ṭhenkhatte chu kan thlenna hotel-ah min rawn hmu a ni," tiin Sinha chuan a sawi.

Bureaucrat hlui Wajahat Habibullah, civil society activist Kapil Kak, journalist Bharat Bhushan leh social activist Sushoba Bharve-ten Sinha hi an zui a ni. Jammu and Kashmir CM hlui Farooq Abdullah, Omar Abdullah, Mehbooba Mufti leh J&K Communist Party of India secretary Yousuf Tarigami-te hi Sinha-te hian hmuh an tum a, deputy commissioner hnena hmuh phalna an dil hnuah hnawl sak an ni. Mahse  Farooq Abdullah hi phone hmanga a biak thu Sinha chuan a sawi. 

Sinha chuan J&K-a special status Article 370 hlihsak a nih hnu aṭang hian mipuite hi an zalen lo hle niin, J&K a tlawh aṭanga a hriat thu a sawi. "Dawr tam takte chu khar a la ni a, J&K hi dinhmun pangngaiah a ding ka la ti ve thei lo," tiin Sinha chuan J&K a hmuhdan a sawi chhuak.