Floor test neih hmain Maha CM leh Dy CM an bang

Supreme Court-in Maha­rashtra sorkar thar chu thlawptu a ngah tawk em, tih vawiin hian House-a fiah tura a tih hnuah, floor test neih hmain nimin tlai khan chief minister Devendra Fadnavis leh deputy chief minister Ajit Pawar-te chu an bang leh nghal. 

Shiv Sena, Nationalist Cong­ress Party (NCP) leh Congress party-ten ṭangrual sorkar siam tuma inbiakna an neih mek laiin, kar kal ta Inrinni zing khan sawilawk engmah awm loin Maharashtra Governor Bhagat Singh Koshyari chuan BJP hruaitu Devendra Fadnavis chu Chief Minister atan leh, NCP hruaitu Ajit Pawar chu Deputy Chief Minister atan a lalut a ni. 

Ajit Pawar hian NCP MLA 54 te chuan BJP nena ṭangrual sorkar siam hi an thlawp vek niin a sawi a, mahse party hotu lu ber Sharad Pawar chuan BJP nena thawhdun chu Ajit Pawar leh MLA hel dang pali panga vel chauhin an thlawp niin a sawi thung. NCP chuan Ajit Pawar hi party legislature wing leader aṭangin a ban nghal a, a aiah Jayant Patil an dah. 

CM leh Deputy CM lakluh an nih hnuah, Shiv Sena, Congress leh NCP chuan sorkar thar hian thlawptu member a ngah tawk lo nia sawiin, Supreme Court-ah floor test neih an phut nghal a ni. Nimin khan party pathumte ngenna hi Justice NV Ramana kaihhruai bench chuan ngaihtuahin, Devendra Fadnavis chuan sorkar siam turin thlawptu a ngah tawk em tih vawiin tlai dar 5 hma ngeiin House-ah fiah turin a ti a ni. BJP lamin hun pek belh tura an ngenna pawh hnawlin, bench chuan floor-test neih hun hi tihkhawtlai zel a nih chuan, MLA inleisak te pawh a thleng thei tih sawiin, hei vang hian a rang thei anga sorkar fiah  chu thil pawimawh a nih thu a sawi a ni. 

Supreme Court-in Maharashtra sorkar fiah tura thupek a tihchhuah hnu lawkah, deputy chief minister Ajit Pawar chuan a ban thu a puang zui ve nghal. Hemi hnu lawkah Fadnavid pawhin press conference neiin, Chief Minister a nihna aṭanga a ban thu a puang ve leh a ni. 

Fadnavis chuan, "Ajit Pawar chuan ka hnenah mimal thil vang nia sawiin banna a thehlut a ni. BJP chuan a tir aṭang khan MLA inlei tih vel hi a tum ve lo. NCP in min thlawp tih an sawi avangin sorkar siam kan tum mai chauh a ni. Mahse Pawar a ban leh tak avangin keipawh ka bang ve leh nghal a ni," a ti a, Pawar-te thlawpna tel lo chuan member an ngah tawk lo tih sawiin, nimin tlai khan Governor hnenah banna lehkha a thehlut a ni. 

Fadnavis chuan sorkar thar siam tur tan duhsakna a hlan nghal thu leh, oppo­sition leader-a a awm zui tur thu a sawi. Fadnavis-a'n banna a thehluh hma lawk hian prime minister Narendra Modi leh home minister Amit Shah-te chuan Maharashtra chungchang ngaihtuah hian meeting an nei bawk. 

Seat 288 awmna, Maharashtra assem­bly-ah hian BJP in seat 105, Shiv Sena  56, NCP 54 leh Congress-in seat 44 an nei. Sorkar siam tur hian thlawptu MLA 145 neih tlin a ngai a ni.