Vanglaini logo

Maharashtra MLA tharte lalut

14th Maharashtra Legis­lative Assembly special session chu nimin khan neih a ni a, sorkar thar siam la ni loin chief minister la nei lo mah se MLA atana thlan thar 288 te chu rinawmna thu tiamtira lakluh an ni. 

Sorkar thar din dawnah chief minister chu lakluh hmasa ber ni ṭhinin, hemi hnuaah Assembly member dangte chu lakluh chhun­zawm an ni ṭhin. State Vidhan Bhawan in-charge secretary Rajendra Bhagawat chuan tun ṭumah erawh chief minister awm loin member-te lakluh phawt an ni tih a sawi. 

Bhagawat chuan sorkar siam tur tihchian la ni lo mah se, Supreme Court thupek angin MLA tharte lakluh an nih theihna atan special session hi neih a nih thu a sawi. Member tharte hi pro-tem Speaker Kalidas Kolambkar-a'n rinawmna thu a tiamtir a ni. 

Chief minister lakluh a nih hnuah a cabinet turte a ruat fel ang,hemi hnua cabinet meeting hmasa berah Assembly session pangngai neih hun tur chu an rel ang. Session neih leh hunah hian sorkar fiahna pawh neih a ni dawn a ni. 
BJP hruaitu leh chief minister hlui Devendra Fadnavis-an NCP hruaitu Ajit Pawar thlawpnaa BJP kaihhruai sorkar siam a tumna chu a hlawhchham. Supreme Court-in sorkar fiah tura hriattirna a tihchhuah hnuah chief minister leh deputy chief minister an nihna aṭangin Fadnavis leh Pawar-te an bang zui  nghal a ni. 

Vawiinah CM lalut dawn
Shiv Sena, Nationalist Cong­ress Party leh Congress party thawkho, 'Maha Vikas Aghadi' tih chuan Thawhlehni tlai khan joint meeting neiin, joint legislature party leader atan Shiv Sena hotu Uddhav Thackeray an thlang. Hemi hnu hian ṭangrual pawlte hian Governor Bhagat Singh Koshyari chu hmuin, thlawptu MLA 162 an neih thu an sawi. 

Vawiin tlai hian  Shiv Sena hotu Uddhav Thackeray chu Maharashtra Chief Minister thar atan lakluh a ni dawn. CM thar lakluh inkhawm hi kumtina Shiv Sena ten Dussehra rally an buatsaihna ṭhin, Dadar-a Shivaji Park-ah neih a ni ang. 

Ṭangrual sorkar siam tur, party pathumte hian chanvo insem dan tur an la tifel lo nia sawi a ni. Chief Minister dinhmun erawh term tluanin Shiv Sena lam hian an chang dawn a ni.