Rel station-a free wifi dah tum kaltlang pui dawn

India ram hmun hrang hranga rel station-a free wifi dah tuma hmalak mekah, a tir aṭanga RailTel Corporation of India Ltd (RailTel)-in thawhpui a tum Google chuan phatsan mah se RailTel chuan station 5,600 chuangah free wifi dah an tum thu an puang. 

Tunhnai  lawk khan US-based tech giant Google chuan an duh anga sum an lakluh tam an rin loh avangin, kum 2020 chhung hian khawvel puma an 'Google Station' programme chu tihtawp an tum tih a sawi a, hei vang hian RailTel Corporation of India Ltd (RailTel) chuan a thawhpui thei dawn ta lo a ni. Kum 2015 khan RailTel leh Google hian inremna siamin, India rama rel station 400 chuangah free wifi dah a nih theih nan ruahmanna an lo siam tawh a ni.

Next Billion Users (NBU)-a Google Vice President Caesar Gupta chuan, "Kum 5 dawn kan lo hman tawh, kan 'Google Station' programme hi mobile data chak leh ṭha tak tak te a awm tak avangin a rawn nghawng tel a, kan hlawk lo hret hret a ni," a ti. India rama internet mobile data rate hi khawvel a tlawm ber a nih thu Gupta chuan a sawi bawk. 

Khawlai hmun emaw mipui punkhawmnaa mipui mimirten awlsam taka wifi an hman zung zung theih nan, Google chuan he an 'Google Station' programme hmang hian software leh hardware fiber connection kaltlanga Google-in Wi-Fi hotspot an dah theih nan hma a la ni. Mahse he hmalakna hi sum lamah a hlawk tak siloah chuan Google chuan kumin chhungin an 'Google Station' programme hi titawp an tum.