President Trump rawn zin tur atan inbuatsaih nasa
US President Donald Trump-an February 24-25 a India ram a rawn tlawhna tur atan theihtawpa inbuatsaih mek a ni.
President Trump hi February 24 chawhma dar 11:55 ah Ahmedabad Airport-ah rawn ṭum a tum a, prime minister Narendra Modi leh official dangte an lo hmuak ang.
Gujarat chief minister Vijay Rupani chuan Thawhṭanni khan Motera stadium tlawhin, security lam inbuatsaih dante a enpui. Khawvela cricket stadium lian ber, Motera stadium-ah hian US President leh a nupui, Melania Trump-te lawmna inkhawm 'Namaste Trump' tih buatsaih a ni dawn a ni.
President Trump hian stadium a pan hmain Mahatma Gandhi chenna ṭhin, Sabarmati Ashram a tlawh hmasa dawn a, minute 25 vel a awm ang. Hemi hnuah stadium panin, mi 1,10,000 lena Motera Stadium a hawng ang a, thu a sawi zui nghal ang.
Tlai dar 3.30-ah PM Modi hoin Delhi an pan leh nghal dawn a, Trump hi palai 250 velin an rawn zui dawn bawk.
Ahmedabad Municipal Corporation chuan Motera area-a mirethei awmkhawmte chu ni 7 chhunga an awmna hmun chhuahsan turin Thawhṭanni khan a hriattir nghal.
Airport aṭanga Motera stadium inkara kawngpuite pawh tihzauh leh chei ṭhat a ni a, cheng maktaduai 300 vel zet an seng tawh. President Trump-a'n a tlawh dawn vanga khawpui chei mawi nan hian cheng maktaduai 60 vel an seng bawk.