Maharashtra CM atan Uddhav Thackeray lalut

Maharashtra Chief Minister atan nizan khan Shiv Sena party hotu, Uddhav Thackeray chu lakluh a ni ta. 

Kum 59 mi, Uddhav Thackeray hi Maharashtra-a Sena-Nationalist Congress Party (NCP)-Congress ṭangrual pawl, Maha Vikas Aghadi chuan joint legislature party hruaitu atan an lo thlang tawh a ni. 

Shiv Sena-ten kumtina Dusshera rally an lo huaihawt ṭhinna leh an party dintu, Bal Thackeray lim awmna hmun, central Mumbai-a Shivaji Park-ah CM thar lakluh inkhawm hi buatsaih a ni a, state Governor Bhagat Singh Koshyari chuan nizan dar 6:45 khan Maharastra Chief Minister 18-na atan Uddhav Thackeray chu rinawmna thu tiamtirin a lalut a ni. Uddhav Thackeray hi Shiv Sena hruaitu zinga Maharashtra CM ni thei pathumna leh, Thackeray zinga CM ni thei hmasa ber a ni bawk. 

CM thar lakluh rual hian a cabinet minister tur paruk; Shiv Sena, NCP leh Congress party aṭangin mi pahnih ṭheuh chu Governor-in a lalut ve nghal bawk. Minister atana lakluhte hi Shiv Sena aṭangin Eknath Shinde leh Subhash Desai, NCP aṭangin Jayant Rajaram Patil leh Chhagan Bhujbal, Congress aṭangin state Congress party president Balasaheb Thorat leh Nitin Raut-te an ni. 

Chief Minister thar hian nizan dar 8 khan a kaihhruai sorkar hnuaia cabinet meeting hmasa ber a ko zui nghal bawk. Party pathumte hian ṭangrual sorkar an siam turah hian an chanpual tur pawh an insem fel tawh. Maharashtra sorkarah hian minister 43 an awm thei a, Shiv Sena chuan chief minister post hi term tluanin a chang dawn a, hei bakah hian minister 15 a nei bawk ang. NCP-in ministry 16 leh Congress-in 12 an chang dawn a ni.  

Sorkar thar lakluh hma, nimin tlai khan ṭangrual pawl hruaitute hian joint press conference neiin, 'Maha Vikas Aghadi' sorkar Common Minimum Program an tlangzarh nghal bawk. Common Minimum Program-ah hian loneitute, an thlai tam tak chantute hnenah zángnadawmna rang taka pek an nih theih nan Crop Insurance Scheme ennawn an tiam. Hei bakah hian loneitute loan ba  ngaihdamsakte leh khawkheng vanga harsatna tawhna hmunah water supply system siamsak an tiam bawk. 

State sorkar hnuaia hnaruak awmte pawh a rang thei anga bera hnawhkhah tiamin, sorkar hna zinga 80% chu state chhung mite tana dahna tur dan siam an tiam bawk a ni.