India-in kum 20 chhungin ramdang satellite 300 kapchhuak

Nilainia Indian Space Research Organisation (ISRO)-in Andhra Pradesh-a Satish Dhawan Space Centre aṭanga PSLV-C47 satellite hlawhtling taka a kahchhuah hnuah, India chuan kum 20 chhungin ramdang satellite 300, ram 33 aṭangin a kapchhuak tling chiah a ni.

India-in ISRO kaltlanga foreign satellite a kahchhuah hmasak ber  chu Germany siam kg 45-a rit DLR-TUBSAT a ni a, Satish Dhawan Space Centre aṭangin kum 1999 May 26 khan a kapchhuak a ni. Ramdang satellite ISRO-in a kahchhuah zingah hian US satellite chu a tam ber. 

Nikum September 16 khan United Kingdom (UK) kutchhuak NovaSAR leh S1-4 satellite kg 445 leh kg 444 a rit te chu, ISRO hian PSLV-CA C42-na atan lo kapchhuak tawhin, UK satellite 14 a kapchhuak tawh. Germany satellite leh Canada satellite 13 ve ve a kapchhuak tawh a, Singapore satellite 8 pawh a kapchhuak tawh bawk. Heng bakah hian South Korea, Belgium, Israel, Switzerland, Algeria leh ramdang satellite-te a kapchhuak nual tawh a ni.

Kum 2017 February 15 kha IRSO-in satellite a kahchhuah hnem ber ṭum niin, ISRO mission 39-na PSLV-C37 satellite 104 a kapchhuak a ni. Heng zinga pathum chu India kutchhuak a ni bawk.