BJP-in an party MP Thakur thusawi dem

Bharatiya Janata Pary (BJP) MP Pragya Singh Thakur chuan Nilaini khan Parliament-ah Mahatma Gandhi kaphlumtu, Nathuram Godse chu ram hmangaihtu tiin a sawi a, a thusawi hi eptu party bakah BJP ngei pawhin na takin an sawisel zui. 

BJP chuan MP Thakur hi a thusawi avang hian defence minister Rajnath Singh kaihhruai, parliamentary committee on defence member aṭangin ban a nih thu a puang nghal bawk. Rajnath Singh chuan Lok Sabha-a Thakur thusawi hi a dem thu sawiin, 'Godse-a ram hmangaihtu tia a sawi chhuak mai ni lo, hetiang zawnga rilru a pu hrim hrim kan dem a ni," a ti. Prime minister Narendra Modi pawhin Gandhi chungchang a sawi dan hi a dem tak zet tih sawiin, Pragya Thakur hian a thusawi avang hian ngaihdam dil pawh ni se, a ngaihdam theih dawn loh thu a sawi. 

Bhopal MP, Pragya Thakur hian Nilaini-a Lok Sabha-a Special Protection Group (Amendment) Bill sawiho laiin Godse chungchang  hi a rawn sawichhuak a, eptu member-ten na taka rawn sawisel nghalin, BJP member dangte chuan Thakur hi ṭhu turin an ti hial a ni. Speaker Om Birla chuan Thakur thusawi chu record aṭang pawhin paih nghal a nih thu a sawi bawk. Pragya Thakur hi kum 2008-a Malegaon-a bomb puaka inhnamhnawiha puhin Unlawful Activities (Prevention) Act  hnuaia thubuai nei lai a ni a, bail-in chhuahtir mek a ni.