Sri Lanka tihhmasawnna turin India-in $mtd 400 a pe dawn
Prime minister Narendra Modi chuan nimin khan India chuan Sri Lanka chu an ram hmasawnna turin a thawhpui dawn tih a sawi.
India-a rawn zin Sri Lanka president Gotabaya Rajapaksa leh Narendra Modi-te chuan nimin khan inbiakna neiin, inbiakna an neih zawha thuchhuah inṭawm an siamah Modi chuan Sri Lanka hmasawnna chu India chuan a ngaipawimawh tih sawiin; 'Neighbourhood First' policy chu an kalpui tih a sawi a ni.
India chuan firfiak beihletna kawngah Sri Lanka a thawhpui zel dawn a, hemi atan hian $mtd 50 a pe dawn tih Modi chuan a sawi bawk. Sri Lanka economy hmasawnna turin $mtd 400 pek a nih tur thu sawi bawkin, India chuan a ṭhenawm ram hmsawnna turin theihtawp a chhuah dawn a ni, a ti.
Gotabaya Rajapaksa pawhin India hnen aṭanga $mtd 400 an dawn chuan Sri Lanka hmasawnna kawngah nasa takin a pui dawn tih leh PM Modi chuan firfiaka chetna chu engtik lai pawhin a do reng tih a sawi. Rajapaksa hian Ningani tlaiah khan India a rawn thleng a, nimin zing khan Rashtrapati Bhawan a tlawh a ni. External affairs minister Dr S Jaishankar leh president Ram Nath Kovind-te pawh inbiakna a neihpui bawk.