Ayodhya-ah bawng kawrlum siam sak

Uttar Pradesh-a Ayodhya khuaa Ayodhya Municipal Corporation chuan kumin thlasik chhunga khaw vawt laka bawng an him theih nan, bawng hak tur kawrlum buatsaih sak an nih tur thu a tarlang.

"Bawngte kawr­lum tur hi kan buatsaih mek a, hemi buaipui hna hi hmun lia thawh a ni. Baishingpur khua aṭangin hma kan la dawn a ni. Tun thla tawp lam hian a thawh khatna atan an hak tur chu peih fel hman kan tum a, pakhat man hi Rs cheng 250-300 inkar a ni ang," tiin Ayodhya Commissioner Niraj Shukla chuan a sawi.   

Shukla chuan bawng no, bawngpui leh bawngpa te tana thawmhnaw lum siamsak tur hi a design hran vek a ni dawn tih sawiin, bawng no tan chuan thawmhnaw nem lam an hmang dawn tihte a sawi. Hei bakah hian bawng inah pawh bawngten vawt an ti tur venna atan mei­chhemna tur te siam a ni dawn tih a sawi bawk.