Article 370 tihtawp hi PM-i'n sipai martarte zahna a hlanna a ni : Amit Shah

Union home minister Amit Shah chuan tunhnaia sorkar laipuiin Article 370 a tihtawp chu Jammu and Kashmir-a firfiakte nen inbeihnaa nunna chan, sipai martar 35,000-te laka prime minister Narendra Modi-a'n zahna a lantirna dik tak a ni, a ti. 

J&K special status tihtawp sak chuan he state-ah hian boruak muanawm a thlen dawn a, hmasawn-na pawh chak zawkin a kal thei dawn a ni, tiin Shah chuan nimina Rapid Action Force (RAF) 27th Rising Day a hmanpuinaah a sawi. 

Amit Shah chuan J&K dinhmun ṭha lo avangin sipaite chuan kum tam tak chhung chu firfiakte beihna avangin nunna an lo chan fo tawh a ni, a ti. "Kum 70 chhung zet hetiang dinhmun an tawk tawh chungin, tumahin a boruak siamṭha turin huaisenna emaw, ngaihven tawkna emaw an nei ngai lo," tiin a sawi a ni. 

Shah chuan Article 370 tihtawp a nih vang hian PM Modi chu lawmthu a hrilh nghal bawk. J&K mipuite chu hmasawnna kawng an zawhpui zel dawn tih a tiam a, sipaite chuan Kashmir boruak muanawm tichhe zawnga chete chu an bitum zel dawn a, remna leh muanna ngelnghet an thlen tawh dawn a ni, a ti. 

Ahmedabad-a Vastral area-a RAF Rising Day lawmnaah hian Amit Shah chuan CRPF mi 20 hnenah huaisen chawimawina a hlan nghal bawk. RAF Rising Day hi October 7 a ni a, mahse union home minister remchan hun a nih avangin nimin khan an hmang. RAF hian battalion 15 neiin, khawpui lian hrang hrangah dah an ni. Unit khatah hian mi 1,000 chuang zel an awm a ni.