Supreme Court-in MDMK hotu Vaiko dilna a hnawl

Supreme Court (SC) chuan nimin khan Marumalarchi Dravida Munnetra Kazhagam (MDMK) hruaitu Vaiko-a'n Jammu and Kash­mir chief minister hlui Farooq Abdullah chhuah zalen tura a dilna chu a hnawl sak.

August 5-a sorkar laipuiin Jammu and Kashmir special status pekna, Article 370 a tih­­tawp khan Farooq Abdu­llah hi house arrest-a hren nghal a ni. Sep­tem­ber 16 khan sorkar laipui chuan Abdullah hi Public Safety Act (PSA) hnuaiah hren a nih thu Supreme Court a hrilh.

PSA hnuaia hren hi kum 2 thleng trial nei loin house arrest a tan tir theih a ni. Chutih rualin Abdullah hi Srina­gar-a a chenna inah a chhungkhatte leh a ṭhian ṭhate a hmuh chu phal sak reng tho a ni. SC chuan sorkar lai­pui leh Jammu and Kashmir thuneitute hnenah, September 16 khan MDMK leader Vaiko-a'n Abdullah chhuah tura a ngenna hi, September 30-ah ngaih­tuah a nih dawn thu an hriattir. Nimin khan ngaihtuah a nih hnuah SC chuan Vaiko-a ngenna hi a hnawl ta a ni.

J&K-a Article 370 tihtawp a nih chung­changa petition lut hrang hrangte chu vawiin aṭang hian judge panga awmna bench chuan a ngaihtuah ṭan dawn.