Hong Kong buaina Australia, Taiwan leh Japan-te'n thlawp

Hong Kong buaina punlun zelah Australia, Taiwan leh Japan-te chuan, Hong kong nawrh huaihawtte an thlawpna lantirin,  kar kal ta Pathianni khan an ram khawpuiah rally an buatsaih.

Sydney, Australia-ah rally hi bul ṭan niin, nawrh huaihawtte chuan kawr dum hain kawngpuiah Hong Kong thlawpna an ti lang. Mipuite chu "I zalenna atan bei rawh" tih leh "Hong kong tan kan ding" tiin an au rual. Melbourne leh Brisbane hmunah pawh 'Hong Kong chu ropui rawh se" tiin nawrh huaihawtte chu an au rual bawk. 

Taiwan khawpui Taipei-ah pawh parliament kawtah mi 2000 chuangin Hong Kong thlawpna lan tirin, nawrh an huaihawt ve bawk. Nawrh huaihawtte chuan China chet dan an dem thu an sawi a, China chuan an ram chu hnehchhuh a tum niin an sawi.  Kum 1949 a Taiwan-in civil war a tawn hnu khan, China hian Taiwan-a island ṭhenkhatte chu an ram chinah a la rinlut lui a ni. 

Japan khawpui Tokyo-ah pawh mi eng emaw zatin Hong kong thlawpna lantirin, nawrh an huaihawt. Kalkhawmte hian "Hong Kong zalenna atan kan bei dawn" tih thuziakte an keng. Hong Kong-ah pawh mihring sang telin nawrh hi an huaihawt leh a, Chinese flag-te chu halin China national day kan lawmpui a che tiin diriam takin an tiel. Police-te chuan nawrh huaihawtte hi tear gas, rubber bullet leh tui hmangin hnawh darh tumin an bei a ni.

Nawrh huaihawtte hian vawiin lamah pawh nawrh hi hmun 16-ah chhunzawm an la tum. Hong Kong sorkarin thiam loh a chantir tawhte mainland China-a thawn an nih theihna tur, extradition bill siam a tum chu duh loin mipuiten lungawi lohna hi an lo lantir fo tawh a ni.