Myanmar-ah Rohingya raltlan 27 hruai kir tawh

Myanmar aṭanga Ban­gladesh-a tlanchhia, Rohingya Muslim raltlan zinga 27 chu an duh thu ngeiin Myanmar ramah hruai kir an ni tawh tih Immigration thuneitute chuan an nimin khan an sawi. 

Raltlan hruai kirte hi Muangtaw, Rakhine state-a reception camp-ah hruai an ni a, an zingah hian naupang pawh an tel. Myanmar leh Bang­ladesh sorkar chuan Ro­hingya raltlante hruai kirna tur hian nikum August thla khan inremna an lo siam tawh a ni. Kum 2017-a Myanmar sipaiten Rakhine state-a Rohingya-te laka beihpui an thlak avang khan Bangladesh ramah hian mi nuai sarih chuang zet an tlanchhe tawh a ni. 

Refugee camp-a awmte hi immigration leh security rule hnuaiah enfiah an nih hnuin, Myanmar sorkar chuan national verification card a pechhuak a ni. Enfiah tawh hi August thla tawp thleng khan mi 3,450 an awm. Heng mite hruaikir tumin Myanmar sorkar chuan ruahmanna siam mah se, raltlante hian an rama kir chu an tan a la him tawk lo nia sawiin kir duh an awm lo. Mahse nimin khan raltlan zinga 27-te chu hruai kir an ni ta a ni.