J&K-ah media mite khuahkhirh an ni lo : Sorkar laipui

Kashmir Times editor Anuradha Bhasin-i'n Jammu and Kashmir special status pekna, Article 370 tihtawp a nih hnuah J&K media mite chu hrek leh khuahkhirh an ni tia Supreme Court-a petition a thehluh chu nimin khan sorkar laipui chuan a chhang. Media mite khuahkhirhna a awm loh thu BJP kaihhruai NDA sorkar chuan a sawi. 

Supreme Court-a affidavit a theh­luhah, sorkar laipuiin media mite chetvelnaah khuahkhirhna siam a ni lo tih sawiin, press briefing leh press release-te pawh neih a ni fo tih a hrilh. Sorkar chuan Article 370 tihtawp a nih chungchangah thu dik lo thehdarh a, buaina chhuak tur venna atan internet, mobile leh landline telephone-te erawh chu tihtawp a nih thu a sawi a ni. 

J&K-a boruak muanawm a awm theihna tura hmalakna chu inlakhran duhtu leh helte chuan an tibuai fo tih sawiin, mipuite pawhin firfiakte lak aṭangin vauna an tawk fo a ni, a ti. Health service pawh pangngai taka kalpui a ni tih sawiin, J&K-a damdawi-in hrang hrangah damdawi pawh stock a tam tawk tih a sawi bawk. Mahse Bhasin aiawha ding, advocate Meenakshi Arora chuan mipuite chuan heathcare service an dawng mumal lo hle tih a sawi thung.

 

Sorkar lamin J&K boruak a pangngai chho tawh niin sawi mah se, Article 370 tihtawp ni, August 5 aṭanga a ni 58-na, nimin thleng khan nun­phung a la pangngai lo hle. Official-te chuan bazar hmunpuite khar a la ni a, public transport-te pawh an la ding tih an sawi. Kashmir-ah chuan nimin thleng khan mobile leh internet service pawh tihtawp a la ni. Official-te chuan boruak awmdan azirin heng service-te hman theih hun tur hi ngaihtuah a ni ang, an ti. 

State sorkar pawhin boruak muan­awm a awm a, zirnate inte pawh dan pangngai anga kalpui a nih theihna turin theihtawp chhuah mah se, nu leh pa tam zawkin an fate chu school an la kaltir ngam lo. Article 370 tihtawp nia state chhunga politician lar leh inlakhran duhtu pawl hruaitu hrang hrang, pawn chhuak thei loa house arrest-a hrente pawh tun thlengin hren chhunzawm an la ni bawk.