School Education Quality Index-ah Kerala pakhatna

NITI Aayog chuan Thawṭanni khan School Education Quality Index (SEQI) a tichhuak a, Kerala chu a pumpuiah pakhatna niin, Uttar Pradesh chu a tawp berna a ni thung.

SEQI-in a huam chu India rama state-te leh union territory-te a ni a, basis of learning an kalpui dante, access and equity outcomes te, infrastructure leh facility-te chu tehfung atan hman a ni. Tamil Nadu chu access and equity out­comes-ah pakhatna an ni a, Karnataka chu learning outcomes-ah pakhatna an ni thung. Infrastructure and facility-ah Haryana chu pakhatna a ni bawk.

Union territory (UT) zingah Chandigarh chu a pumpuia pakhatna a ni a, Lakshadweep chu a tawp berna a ni thung, He index kaltlang hian sorkar laipui chuan school education lama an chakna leh chak lohna an hre thei dawn a, eng ang ruahmanna kalpui zel chi nge tihte a hre thei dawn a ni.

West Bengal chu he index-ah hian an tel ve duh lo nia sawi a ni. SEQI hi Union Ministry of Human Resource Development (HRD) chuan World Bank leh sector expert-te puihnain a tichhuak a ni.