Gandhi Sankalp Yatra thla thum chhung atan pawtsei

Bharatiya Janata Party (BJP) chuan "Gandhi Sankalp Yatra" chu thla thum chhung atan an pawtsei.

He yatra hi October 2-31 thleng neih tura tih a ni a, mahse nimin khan thla thum chhung atan pawt seiin, nakkum January 31 thleng tur atan tih a ni. BJP chuan India hnampa Mahatma Gandhi piancham vawi 150-na puala "Gandhi Sankalp Yatra" programme an kalpui turah hian, Gandhi-a idea, non-violence, Swaraj, faina leh inngaihtlawmnate chu India mipuite zingah thehdarh an tum a ni.

BJP hian Gandhi Sankalp Yatra committee member 10 awmna a ruat a, an General Secretary Arun Singh chuan he committee kaihruaitu hi a ni. Party headquarters aṭangin he programmme a hlawhtlin theih nana an buatsaih poster, banner leh kits-te chu state unit-te hnenah pek a ni dawn. 

Prime Minister Narendra Modi chuan Gujarat aṭangin he programme neih tur hi a hawng dawn a, hemi rual hian New Delhi-a BJP headquarters aṭangin hruaituten bul an rawn ṭan ve ang. BJP working president Jagat Prakash Nadda leh hruaitu dangte pawh anmahni constituency-ah ṭheuh Gandhi Sankalp Yatra hi kalpui tura tih an ni bawk.