Balakot air strike hnuah Pakistan drone hmuh tur tam

Kumin February 26-a Indian Air Force-ten Balakot-a air strike an neih hnu khan Punjab ramri velah chuan Pakistan drone hmuh tur an tam hle niin ramria chengte chuan an sawi.

Pathankot aṭanga Fazilka district inkar velah Pakistan drone-te hi hmuh an ni ber a, sipai officer pakhat chuan an sipaite chuan a thawm an hriat bakah a light engte pawh an hmu ṭhin a, mahse an ralthuam ken a len loh avangin an kap thla thei lo niin a sawi bawk.

Indian Express chuan hemi chungchang hi tarlangin, zan lamah drone-te hi an che ber niin an tarlang. Defence silai lian zawkte awmna hmunah pawh heng drone-te hi hmuh an ni tho a, kah thlak tum ṭhin mah se an 'low radar profile' vangin kahthlak an harsa hle nia tarlan a ni.

Punjab Police-te chuan a hmain drone hmangin Pakistan aṭanga ralthuam tawlhruk a ni ṭhin tih an lo sawi tawh bawk a, heng drone-ahte hian GPS dah niin ralthuam kg 10-a rit thleng an keng thei tih an sawi. September thlaah pawh khan van aṭanga ralthuam thlak tam tham tak an man tawh niin police-te chuan an sawi bawk.