Jammu hruaitute house arrest aṭangin chhuah

Jammu and Kashmir-a Jammu biala local body inthlan neih dawn vangin, Jammu politician house arrest-a hrente chu nimin khan chhuah an ni. Mahse Kashmir Valley lam amite erawh chu hren chhunzawm an la ni thung. 

Sorkar laipuiin August 5-a J&K special status pekna, Article 370 a tihtawp khan J&K-a political party hruaitute leh inlakhhran duhtu pawl hruaitute chu pawn chhuak theih loin, house arrest-in hren zui nghal an ni. Politician hrenbeh hi mi 400 dawn an tling a ni. 

Jammu-ah hian Block Development Council inthlan neih a nih tur thu sorkar chuan a puang a, hemi hnu lawk hian Jammu politician hrente pawh chhuah a ni zui nghal bawk. Heng politician-te hi an chetvelnaah pawh khuahkhirhna engmah siamsak zui an  ni lo. 

Hetihlai hian Kashmir Valley-ah chu ni 57 chhung inbiakpawhna leh internet-te tihtawp a la ni.  August thla khan house arrest-a hren zinga mi, chief minister hlui Mufti Mehbooba fanu, Sana Iltija Jave chuan home minister Amit Shah hnenah lehkha thawnin, a nu chu a biakpawh theih loh thu leh, a hriselna dinhmunte a ngaihtuah thu a hrilh. Kashmir mite chu ransa, bawma khung beh anga maia hrekbeh an nih thu sawiin, an dikna chanvote chu nasa taka palzut sak a ni, a ti. United Nations pawhin Kashmir dinhmun chu ngaihven a ngai hle niin a lo sawi tawh bawk. 

Jammu-a Block Development Council inthlan hi October 24 hian neih a ni dawn a, hemi ni vek hian vote tlate chhiar nghal a ni ang.