India hnampa pianchamah zahna lan tir

India hnampa Mahatma Gandhi pianchampha vawi 150-na pualin,  Parliament-a Central Hall-ah nimin khan Prime Minister Narendra Modi, congress working president Sonia Gandhi leh ram hruaitu ṭhenkhatte'n, zahna lantirin thalak bulah pangpar an dah.

He hunah hian Lok Sabha Speaker Om Birla, BJP veteran L K Advani, Defence Minister Rajnath Singh, Rahul Gandhi, Rajya Sabha Opposition Leader Ghulam Nabi Azad-te pawh an tel a ni. Hemi rual hian prime minister Lal Bahadur Shastri-a piancham vawi 115-na pualin,  a thlalak bulah pangpar an dah ve bawk.

Air India chuan Mahatma Gandhi piancham lawmnan Indira Gandhi International Airport New Delhi-ah, an thlawhtheihna Airbus A320 aircraft meiah Gandhi lem an ziak.

A lem an ziah hi feet 11 bawrvela sang leh feet 5-a hlai a ni a, he thlawhtheihna Airbus A320 aircraft mei hi feet 20-a sang leh feet 8-a hlai a ni.  Air India CMD chairman leh managing director Ashwani Lohani chuan mipuite'n Gandhi thuchah kan hriat thar nan tiin, a vawikhat nan kan thlawhtheihna meiah hian Gandhi lem hi kan ziak a ni, a ti. 

Airbus A320 aircraft bakah hian international flight Boeing 787, 777 leh 747 model-ah te pawh Gandhi thuchah ropui tak kan hriat thar zel theihnan, a lem ziah tum a nih thu a sawi. Air India chuan Gandhi piancham pual hian, faina hapta kan kalpui mek a ni, tiin a sawi bawk.

Khawvel pumah Gandhi piancham hi 'International Day of Non-Violence' atan hman a ni. Gandhi hi kum 1869 Oct 2 khan Gujarat-a thingtlang khua Porbandar-ah a piang a, a hming tak chu Mohandas Karamchand Gandhi a ni.