An ram aṭanga oil lakluh loh vangin Iran a lungawi lo lo : Jaishankar

External Affairs Minister S Jaishankar chuan India-in Iran aṭanga oil a lakluh loh avangin Tehran chu a lungawi lo hle nia sawi chu thudik lo a nih thu a sawi.

An ram aṭanga oil lakluh loh vangin Iran a lungawi lo hran lo tih leh India leh Iran chuan inkungkaihna ṭha tak an neih thu a sawi bawk. US India Strategic and Partner­ship Forum (USISPF) Thawhlehnia buatsaiha thu a sawinaah Jaishankar chuan India lakah Iran a lungawi lo nia sawi awm chu a pawm lo toh sawiin, Iran mite chu thil diktak duh mi an nia a hriat thu a sawi a ni. US-in nikum November thla aṭang khan Iran a hrek a, hemi hnu kumin June khan US chuan ram pariatte chu Iran aṭanga an oil lak titawp turin a ti bawk. Chung zingah chuan India, China, Turkey leh Japan-te pawh an tel. 

"Iran nen hian politics lamah inkungkaihna ṭha tak kan nei. Cultural lamah pawh inkungkaihna ṭha tak kan nei. Kan thawkdun reng a ni. An ramah pawh Afghanistan-a service port kan nei a ni," tiin a sawi bawk. Iran hi India-in oil a lakluh tamna ram pathumna a ni a, April 2017 aṭanga January 2018 chhung khan crude oil tonne maktaduai 18.4 zet chu Iran aṭang hian a lalut a ni.