Loneituten sorkar laipui rawtna hnawl

Sorkar laipuiin farm law duh lohna lantira hun rei tak nawrh huaihawt tawh, loneitute nen inremna an neih theihna tura kum khat leh a chanve chhung farm law hman rih loh leh joint committee siam a rawtna chu loneitu lamin an hnawlsak. 

Loneitute hian farm law pathum siam tharte hi sut leh vek tura sorkar phutin, nikum November thla tawp lam aṭang khan lungawi lohna lantirin, Delhi border-ah a inkhuar tawh a ni.  Ṭum tam tak loneitu leh sorkar lam aiawhte hian inbiakna lo nei tawh mah se inremna an la siam thei lo. Loneitu lam hi dan tharte hi sut leh vek an phut a, mahse sorkar lam chuan hei hi a pawmpui thei bik lo a ni. 

Nilaini khan sorkar laipui chuan farm law thar hi kum khat leh a chanve chhung hman rih lo phawt a, hemi chhung hian joint committee an din hmanga inremna siam dan kawng ngaihtuah a rawt a ni. Sorkar laipui rawtna hi loneitu lamte chuan a ngaihtuah ve leh a, an sawihonaah nawrh huaihawt mek loneitu pawl hrang hrang 32 zinga 10 chuan rawtna hi pawm an duh a, mahse a tam zawkin duh loin sorkar rawtna siam hnawlna tur resolution chu a tlang ta a ni. 

Nawrh huaihawt buaipuitu ber,  Samyukt Kisan Morcha chuan meeting an neih hnuah thuchhuah siamin, "Samyukt Kisan Morcha general body meeting neihah sorkar laipui rawtna hi kan hnawl a ni. Sorkarin law farm pathum a siam tharte hi sut leh vek a, MSP chungchanga kan thil phut pawh a tihhlawhtling  ngei kan phut a ni," a ti. 

Farm law duh lohna lantirnaa loneitu 143 thi te zahna an hlan tih sawi bawkin, heng mite inpekna hi a thlawna luan ral tir mai an tum lo a, farm law tharte hi sut leh vek a nih hma chuan inlamlet an tum lo tih an thuchhuah chuan a tarlang. 

Loneitu pawl hruaitute chuan tunah chuan January 26-a Delhi-a tractor rally neih an tum chungchang chu an buaipui tawh tih sawiin, Republic Day lawmna tibuai lo turin rally hi an nei dawn tih an sawi. Parade neihna tur Rajpath ah lut loin, Outer Ring road-a km 16-17 a thuiah rally hi neih an tum a ni.