JeM firfiak pali Delhi-ah an lut
Delhi Police-ten Pakistan-a Jaish-e-Mohammad (JeM) firfiak pali-te Delhi-ah an lut tih thu an dawn avangin nimin khan khawpui chhungah venhimna khauh taka kalpui a ni. Ramchhunga airport zawng zawngte fimkhur leh inralring tura hriattir an ni nghal bawk.
Delhi Police Special Cell chuan intelligence report an dawn hnuah khawpui chhunga hmun hrang hrang an dap nghal a ni. Durga Puja leh Ramila lawmna tura inbuatsaihna hmun hrang hrangte pawh uluk taka enfiah leh ven a ni.
Security agency-te chuan August 5-a sorkar laipuiin Jammu and Kashmir special status pekna, Article 370 titawp a, union territory pahniha ṭhendarh a nih tur thu a puan hnu khan, sorkar laka lungawi lo ten pawikhawihna an thlen mai a hlauhawm avangin venhimna lam pawh an uluk hle a ni.
September thla khan sipaite chuan Kashmir Valley-ah Pakistan firfiak 450-500 vel luh tum an awm mek tih thu an dawn vangin ramriah pawh venhimna khauh taka kalpui a ni. India rama rawn luh tum, firfiak zinga ṭhenkhat chu kumin February thlaa Indian Air Force (IAF) ten an beih, Balakot-a JeM camp-a train chhuak tawhte nia sawi an ni bawk.
Indian Army-te chuan India chhim lam chu firfiakten an bei mai thei nia thu an dawn thu an sawi a, Sri Creek aṭangin lawng ṭhenkhat kalsan pawh an hmu tih an sawi. Hei vang hian firfiakte pawikhawihna thleng thei tur venga theihtawp an chhuah thu General Officer Commanding-in-Chief, Army Southern Command Lt Gen SK Saini chuan a sawi.
Tamil Nadu-ah chuan August thla aṭang khan Lashkar-e-Taiba firfiak ṭhenkhat an lut nia sawi a nih vangin venhimna pawh tihkhauh a ni tawh bawk.