2022-ah Kashmir-Kanyakumari rel tlan tir dawn
Union railway minister Piyush Goyal chuan nimin khan kum 2022 August 15 hmain Kashmir aṭanga Kanyakumari thleng rel tlan tir a nih tur thu a sawi.
Jammu and Kashmir-a thingtlang khua Katra aṭangin Banihar rel kawng chu sial zawh tawh a ni a, Chenab lui chunga rel kawng erawh chu sial mek a ni. J&K-ah hian hel vangin duh anga chakin hmalakna hi a kal hleih theih loh thu, New Delhi aṭanga Katra kal tur rel Vande Bharat rel a vai liamnaah Goyal chuan a sawi ni.
He hunah hian Goyal chuan huaisen taka prime minister Narendra Modi leh Amit Shah-te hmalakna avangin Article 370 chu ṭhiah a nih thu sawiin, an zarah tunah chuan Kashmir mite leh India mipuite chu kan inpawh tlang tawh dawn a ni, a ti.
Tunah hian railway station 5,000-ah Wi-Fi hman a ni tawh a, station 6,500 dah belh tum mek a ni. Railway station tinah CCTV camera dah a ni tawh bawk. New Delhi aṭanga Shri Mata Vaishno Devi Katra rel Vande Bharat train vai liamnaah hian union home minister Amit Shah, union minister- Dr Jitendra Singh leh Dr Harsh Vardhan-te pawh an tel.
He hunah hian Amit Shah pawhin thu sawiin, Kashmir aṭanga Kanyakumari rel kawng siam a nih hunah chuan J&K hian tourist a hip dawn a ni. Article 370 a awmlai kha chuan duh angin J&K hmasawnna tur kalpui hleitheih a ni lo. Mahse tun aṭang kum 10-ah chuan J&K hian nasa takin hma a sawn dawn a ni, a ti.