Pakistan-a Kartarpur-ah PM, President leh Manmohan Singh an zin dawn

Guru Nanak piancham vawi 550-na puala Kartarpur Gurudwara, Pakistan-a a lawmna neih tura sawmna chu prime minister Narendra Modi leh president Ram Nath Kovind-ten an pawm hnuah prime minister hlui Manmohan Singh pawhin nimin khan sawmna a pawm ve leh.

Kartarpur Sahib Gurudwara-ah hian November 9 aṭang hian Guru Nanak piancham hi lawm a ni dawn a, heta tel tura sawmna hi Punjab chief minister Amarinder Singh chuan a pawm hnuah PM leh President hi a sawm ve leh a ni. Amarinder Singh chuan nimin khan a twitter-ah PM hlui Dr. Manmohan Singh chu a chenna inah hmuin Kartarpur-a kal tura a sawm thu leh a ni pawhin a lo pawm thu hi a sawi.  

Pakistan hian Indian Sikh pilgrim-te tan November 9 aṭangin Kartarpur Corridor hi a hawng dawn a, Guru Nanak piancham tak erawh November 12 a ni thung. Kar hmasa khan Pakistan foreign minister Shah Mahmood Qureshi pawhin PM hlui Manmohan Singh chu Sikh Community aiawh tura an sawm dawn thu a lo sawi tawh a ni.