Chopper kan kahthlak kha tihsual lian tak a ni : IAF chief
Indian Air Force (IAF) chief Kumar Singh Bhadauria chuan kumin February 27-a Kashmir-a India leh Pakistan thlawhtheihna an inbeih ṭum a, IAF thlawhtheihna an kap thla tel kha an tihsual lian tak a nih thu a sawi. He thil thleng vang officer pahnihte lakah disciplinary action lak a nih thu a sawi bawk.
Air chief chuan, "Kan tihsual lian tak a ni tih pawh kan pawm e," tiin, an missile kahchhuah chuan helicopter hi a fuh tih a sawi. Hetiang thil hi a thlen nawn tawh lohna turin a ṭul angin hma pawh an la nghal tih a sawi.
February 27 khan Mi17V5 chopper chu Srinagar bul, Budgam-ah Srinagar airbase aṭanga Spyder air defence missile system aṭanga kahchhuah chuan fuhin a tla a ni. Helicopter tla hi nasa takin a kang zui nghal bawk. He thil thleng hi chhui chian a ni hnuah, hemi hunlaia air defence system enkawltute chu hriatchhuah an ni tawh a ni.
Balakot airstrike promo video tlangzarh
IAF chuan nimin vek khan February thlaa Balakot, Pakistan-a Jaish-e-Mohammed (JeM) firfiak camp an beihna chanchin promotional video an tlangzarh. Kumtina an hman ṭhin Air Force Day hmannaah Air Chief Marshal Rakesh Kumar Singh Bhadauria chuan video hi a tlangzarh a ni.
Asian News International-in twitter-a video a tihchhuah aṭanga a lan dan chuan thlawhtheihna ṭhenkhatin firfiak tawmbuk an bitum lai leh an tichhe laite a lang a, briefing room-a IAF pilot-te pawh langin an fighter jet pana an tlan laite leh an thlawkchhuak laite pawh a lang.