Maoists-ten Jharkhand police pahnih kap hlum

Jharkhand-a Ranchi leh Khunti district inrinaah nimin zing hma takah khan Jharkhand Jaguar police-te leh Maoists helte an inkap a, Jharkhan police pahnih an thi.

Additional director general of police (operations) ML Meena chuan nimin vek khan police pahnih an thih thu hi sawichiangin, Dakapidhi ramngaw leh a chhehvelah Maoist helte an awm tih thu an dawn bawh­zuiin force an tirh luh thu a sawi.

Beihpui an thlaknaah hian zing dar 4-5 inkar velah hel lam hian silai hmetpuakin an inkap zui tih a sawi a, Jharkhand Jaguar police pahnih an thih tih hi a sawi. Pakhat hi a hmunah thi nghalin pakhat zawk erawh hi chu Ranchi hospital-a enkawl a nih laiin a thi tih a sawi a ni.

Jharkhand Jaguar-te hi state chhak lama Maoists helte bei tura special task force din an ni a, Jharkhand Armed Police, Indian Reserve Battalion leh district police aṭangtein member tur an thlang chhuak ṭhin a ni.