Mipui hmuhah Farooq Abdullah inlan

Jammu and Kashmir special status pekna, Article 370 tihtawp a nih hnua house arrest-a hren, National Conference party presi­dent leh J&K chief minister hlui Farooq Abdullah chu nimin khan thla hnih hnua a vawi khatnan mipui hmuhah a inlan. 

Srinagar-a a chenna ina hren, Farooq Abdullah hi Governor Satya Pal Malik-an hmuh a phalsak hnuah nimin khan NC palai, mi 15-ten a inah hian a hmu an ni. NC palaite hian Abdullah fapa, J&K chief minister hlui Omar Abdullah pawh nimin vek khan an hmu bawk. Omar pawh hi August 5 aṭang khan hren a ni ve bawk a, state guest house-ah hren mek a ni. 

Farooq Abdullah hi pawn lamah amah tlawhtu NC palaite nen an inlan a, amah pawh a hrisel ṭhat hmel nia sawi a ni. Abdullah tlawhtu zinga mi, NC hruaitu Hasnain Masoodi chuan an state special status tihtawp sak an nih chungchangah bum an ni tih sawiin, Article 370 hi lakkir leh ngei an tum dawn tih a sawi. Sorkar laipui thiltih dan chu constitution zah lohna leh sawisakna a ni, a ti. 

Article 370 tihtawp a nih dawn khan Abdullah-te pafa bakah, J&K-a politician larte pawh house arrest-a dah an ni a, an zingah hian CM hlui Mehbooba Mufti leh Kashmir People's Conference chairman Sajjad Lone-te pawh an tel. 

Vawiin hian Peoples Demo­cratic Party (PDP) palaite chu an party hruaitu Mehbooba Mufti chu a inah hmuh phalsak an ni dawn bawk. 

Tun hnaiah Jammu biala politician hrente chu chhuah an ni tawh a, mahse Kashmir Valley amite erawh chu hren an la ni thung. J&K Governor adviser, Farooq Khan chuan Kashmir hruaitute chu a mal te tea an chungchang endik a nih hnuah chhuah zalen an ni chauh dawn tih a sawi.