PMC Bank pawisa khawih chingpen thubuaiah Waryam Singh man

Punjab and Maharashtra Cooperative (PMC) Bank chairman hlui Waryam Singh chu Inrinni khan pawisa khawihchingpen thubuaiah an man.

Waryam Singh hi police kutah October 9 thleng awm tura tih a nih thu nimin khan tarlan a ni a, Mumbai police-a Economic Offences Wing (EOW)-te chuan cheng vaibelchhe 4,445 khawih chingpen thubuaiah Inrinni chawhnu khan an man a ni. 

EOW hian PMC bank pawisa khawihchingpen thubuaiah hian mi pali an ringhlel a, heng zingah hian Waryam Singh hi a tel a ni. Ani bakah hian PMC Bank Managing Director hlui Joy Thomas chu lo man tawh bawkin ani pawh hi October 17 thleng police kutah a awm ang.

Police-te chuan Joy Thomas hi mawhphurtu ber zinga pakhat a ni tih court hnenah an hrilh a, ani bakah hian an rinhlelh dang Rakesh Wadhawan leh Sarang Wadhawan-te pawh police-te hian an kawl mek a ni.