India-Bangladesh Thawhdunna tur pasarih ziak

New Delhi-a "India-Bangladesh Business Forum" hmang tura rawn zin, Bang­la­desh prime minister Sheikh Hasina leh prime minister Modi-te chuan ram pahnihte thawhdunna tur, inremna thuthlung pasarih an ziak.

Kar kal ta Inrinni khan India leh Bangladesh thawh­­dunna tur pasarih hi New Delhi-ah Sheikh Hasina leh Modi-te chuan an ziak. Inremna an ziahah hian inkalpawhna, zirna, tui, ṭha­laite hmakhua ngaihtuah, mi­hring inchherchhuahna, hnam zia inhriattawnna leh lui kama inralringna lama thawhdunna turte a tel a ni. 

Hemi bakah, Bangladesh aṭangin India ram hmarchhak state-a Liquefied Petroleum Gas (LPG) lakluh theihna tur project pathum  hawn a ni bawk. PM Modi chuan  kum liamta khan India leh Bang­ladesh hian project 12 rua­hmanna a kalpui a, kar kalta Inrinni khan heng zinga rua­-hmanna pathum chu hawn a ni thei ta tih a sawi. 

External Affairs Ministry thupuangtu Raveesh Kumar chuan, "Kan inbiakna hi ram pahnihte inkungkaihna a ni a, India leh Bangladesh hian kawng hrang hrangah thawhdunna kan nei zel dawn a ni," a ti. He inbiakna neihah hian Prime Minister Sheikh Hasina chuan National Re­gister of Citizens (NRC) Assam-a hman a nih chu Bangladesh mite tan chuan ngaihven ngai tak a nih thu a sawi. Hemi rual hian Narendra Modi-a hmalakna hi a rintawk thu a sawi.

Modi chuan ram pahnihte inbiakna chu tluang taka neih a nih avangin, a lawm thu a sawi ve bawk.