SC-in thing kit tawh lo turin Maha sorkar hriattir
Supreme Court chuan Maharashtra sorkar hnenah, Mumbai Metro car shed siamna atan Aarey area-a thingkungte chu kih belh tawh lo turin nimin khan a hriattir.
Justice Arun Mishra kaihhruai bench chuan activist leh thingkung kih duh lohna lantira nawrh huaihawttu dang, police-ten an mante pawh chhuah nghal turin a hriattir bawk a ni. Maharashtra sorkar aiawha ding, Solicitor General Tushar Mehta chuan bench hnenah pawh car shed siamna turin thingkung kih belh a ngaih tawh loh thu a hrilh ve bawk. Hemi chungchang hi October 21-ah ngaihtuah chhunzawm leh a ni ang.
Car shed siamna tura thingkung eng emaw zat kih a nih chungchangah, law student-ten Chief Justice of India Ranjan Gogoi hnenah ngenna an thlen a, dang tura an ngen hnuah hemi chungchang hi bench chuan a ngaihtuah a ni. Thingkung kih hi green activist leh tualchhung mite chuan na takin an lo dodal tawh a ni.
Aarey area hi Sanjay Gandhi National Park buhah awmin, thingkung nuai nga vel a awm a ni. Mahse he hmuna thingkungte hi Mumbai metro-3 project hnuaia car shed siamna turin kih tura tih a ni a, hei hi duh lohin mi eng emaw zatin nawrh an huaihawt. Hei vang hian kar kalta Inrinni khan Aarey-ah hian CrPC Section 144 puan a ni.