Chennai-ah CAA, NRC, NPR duh lohna kawngzawh huaihawt

Muslim pawl hrang hrangte chuan nimin chhun khan Chennai-ah Citizenship Amend­ment Act (CAA), Natio­nal Register of Citizens (NRC) leh National Population Register (NPR) duh lohna kawngzawh an nei. 

Kawng zawhte hian Chen­nai-a Walajah Road ṭangin kawng an zawh ṭan a, Secretariat leh District Collector office thleng kawng zawh tum mah se, Chepauk-ah kawng zawh chu tihtawp lailawk a ni. Kawng zawha nawrh huaihawtte hian an state sorkar chu  CAA duh lohna resolution chu pass ve ngei tura an phut thu an tarlang. 

Buaina chhuah palh ven­thawn thilah state sorkar chuan kawng zawhna bul hnaiah police 500 dawn a dah thu police-te chuan an sawi a, kawngzawha tel hi mi 5,000 chuang an nih thu an tarlang bawk. Thawhlehni khan chief minister Edappadi K Palaniswami chuan sorkar laipui hmalakna a nih avangin, an state assembly chuan CAA duh lohna resolution an pass theih loh thu a sawi a, hei vang hian nawrh huaihawt chhunzawm an ni ta a ni. 

Kawng zawhnaah hian Federation of Tamil Nadu Islamic, Indian National Cong­ress, Dravida Munnetra Kazha­gam, Communist Party of India leh Political Organisation hrang hrangte an tel bawk a ni. District Collector office thleng kawng zawh chu tum mah se Chepauk-ah kawng zawh kharna inkhawm neih a ni a, he hunah hian kal khawmte chuan national anthem 'Jana Gana Mana' an sa bawk.