Covid-19 vangin damdawi siamtute'n harsatna nei dawn

India Pharmaceutical Alliance (IPA) chuan active pharmaceutical ingredient (API) stock sa chu thla hnih/thum daih chauh an neih tawh thu tarlangin, Covid-19 vanga Indian Pharma Industry-te'n harsatna an neih chhoh dawn thu an tarlang bawk.

India hian China aṭangin API hi cheng vaibelchhe 17,000 man a lak luh thu IPA Secretary General Sudarshan Jain chuan a sawi. "Kan hun tawn hi a lungchhiat thlak a, engtikah nge he hri leng hi a reh dawn tuman kan sawi lawk thei bawk si lo. Chuvang chuan theihtawpa sorkar laipui nena lungrual taka hma kan lak a ngai nasa leh zual dawn a ni," tiin Jain chuan a sawi.

Hetiang hi India-a damdawi siamtute thil tawn a nih tak avangin damdawi siamna hmanrua API hi China aṭang chauh ni lo, Europe aṭang pawha  nasa leh zuala lak luh a nih theih nan hma lak a ṭul tih IPA chuan a tarlang.