Mamata-i'n TMC MP hlui thihnaa Mawhphurtuah BJP sorkar puh

West Bengal chief minister leh Trinamool Congress (TMC) hruaitu Mamata Banerjee chuan an party MP hlui Tapas Paul thihnaah central-a BJP kaihhruai sorkar laipui chu mawhphurtuah a puh.

CM Banerjee chuan Tapas Paul hi thla 13 zet jail-ah dah a ni tih a sawi a, amah hi Bengali actor hlui a nih avangin mi hriat pawh a hlawh a, mahse jail-a dah a nih chhan leh a thil tihsual hi tumahin an hre lo a ni, a ti. TMC hotunu chuan Paul chu sorkar laipui lamin a nawr leh zar buai nasat avangin a nunna in a tuar ta niin a sawi. 

Mamata chuan sorkar laipui lam nawrna vangin Sultan Ahmed leh Prasun Banerjee nupuite pawhin nunna an lo chan phah tawh a ni, a ti. Miin dan a bawhchhia a nih chuan hremna pawh a hmachhawn ngei tur a ni a, mahse heng mite hian sorkar laipui lam aṭanga zar buaina an tawk reng a ni, a ti. 

Tapas Pal leh midangte hian hremna tawk tur hian eng thil sual nge an tih an hre lo tih Mamata Banerjee chuan a sawi. Tapas Paul thihna chuan a tina hle tih sawiin, mipuite chuan thu dik tak an hriat a ngai tih a sawi. 

Kum 2016, December thla khan Rose Valley chit fund scam kaihhnawihah Tapas Paul hi manin, thla 13 jail-a a tan hnuah bail-in a chhuak. Jail aṭanga a chhuah hnu hian lung ṭha lo a neih avangin damdawi-inah enkawl a ngai fo a ni. Thawhlehni khan Mumbai aṭanga Kolkata-a a haw tur chu Mumbai airport-ah a heart attack a nei a, damdawi-inah hruai ni mah se, zing dar 4 khan a thi a ni.