J&K hi UT a ni reng dawn lo : Amit Shah

Sorkar laipuiin Jammu and Kashmir special status pekna, Article 370 a tihbo hnuah J&K state chu ṭhiatin, union territory pahnih - Jammu and Kashmir leh Ladakh ah a ṭhen nghal. Mahse Thawhṭanni khan union home minister Amit Shah chuan J&K chu UT a ni kumkhua dawn lo tih a sawi. 

Indian Police Service (IPS) 2018 batch probationer-te hmaa thu a sawiah, Amit Shah chuan J&K chu UT a ni reng dawn bik lo tih sawiin, boruak awmdan en thlithlai reng a ni a, security dinhmun  a ṭhat  hunah state-ah dah let leh a ni dawn a ni, a ti. 

August 5-a Article 370 tihtawp a nih hnuah, J&K-ah chuan silai mu pakhat pawh kahchhuah a la ni lo a, silai hmehpuah vanga thi pawh an la awm lo a ni, tiin Shah chuan a sawi bawk. Article 370 chu Kashmir culture leh a mite nihna humhalhtu ni anga ngaihna chu a dik lo a ni tiin, India Constitution chuan hnam hrang hrangte nihna chu a venghimin a humhalh vek tih a sawi. Article 370 hmansual chu ramri kaltlanga firfiaka chetna lo chhuah theih phahna a nihthu a sawi a ni.