Vawiin aṭangin India-China summit ṭan dawn

Prime minister Narendra Modi leh China president Xi-Jinping te chuan vawiin aṭang hian informal summit ṭum hnihna an nei dawn.

Meeting hi Mamallapuram, Tamil Nadu-a seaside resort-ah neih a ni dawn a, vawiin leh naktuk hian an nei ang. Ram pahnih hruaitute hian nikum pawh khan informal summit hi an lo nei tawh bawk. Wuhan-ah  ram pahnih inlaichinna ṭha zawk siamna turin meeting hi an nei dawn a ni. 

External affairs ministry chuan thuchhuah a siamah ram pahnih chungchang te, ram pahnih leh a chhehvel bakah khawvel pum huap pawha thil pawimawh hrang hrang chungchang an sawi dawn a, India-China Closer Development Partnership chungchanga an hmathlir leh ngaihdante an sawi dawn bawk tih a tarlang.

Xi-Jinping lo zin dawn hnaihah Arunachal Pradesh-a ram pahnih inrina, Line of Actual Control (LAC) bula India sipaiten exercise an neih chu China lam hian an helh viau a, hetichung hian meeting an neih tur erawh  a nghawng dawn lo niin a lang.

Modi leh Xi meeting tur hi Chinese media-te pawhin an tarlang nasa hle a, tun hi kumin chhunga ram pahnih hruaitute inhmu ṭum thumna tur a ni tawh bawk. Ram pahnih inrina chung­chang te, ramria remna leh muan­na awm theihna tur chung­changte bakah hian India lam hian firfiak doletna kawngte pawh an sawidun rin a ni.

Ruahman anga thil a kal a nih chuan Xi-Jinping hian vawiin chawhnu lam hian Chennai a rawn thleng ang a, world heri­tage site-a temple leh hmun hming­thang tak takte a fan hnuah Modi hian zanriah a buat­saih sak dawn a ni.

China president-in a tlawh dawn avang hian Mamallapuram hi an inbuatsaih nasa hle a, venhimna khauh taka kalpui niin motor tlandan tur thlengin nasa takin an inbuatsaih a ni.