J&K-ah khualzin luh phalsak
Jammu & Kashmir-a Amarnath Yatra tihtawp a nih hnu leh, khualzinte luh khap an nih aṭanga thla hnih a liam hnuah, nimin khan sorkar laipui chuan Kashmir Valley-a khualzin te luh a phalsak ve leh ta.
Firfiak venthawn thilah August 2 khan sorkar laipui chuan J&K-a Amarnath Yatra neih mek chu titawpin, sakhaw hmun tlawh tuma kalte leh khualzin dangte pawh Kashmir chhuahsan thuai turin a lo hriattir tawh a ni. Yatra tihtawp a nih leh, khualzinte chu Kashmir Valley aṭanga inthiarfihlim tura hriattir an nih hnu lawk, August 5 khan sorkar laipui chuan Jammu and Kashmir special status pekna, Article 370 chu a ṭhiat zui a ni.
Sorkar chuan nimin aṭang khan Kashmir chu khualzinte luh theih tura hawn a ni ta tih a sawi. Nilaini aṭang khan higher secondary school, college leh university-te chu hawn leh a ni bawk a, hmun ṭhenkhatte chuan zirna inte hi khauh taka la ven an ni bawk.
August 5-a Article 370 tihtawp a nih hnu khan, Jammu and Kashmir-ah hian sorkar laipui chuan venhimna khauh tak hmangin J&K hi a vil reng a, tun thlengin hmun ṭhenkhatah te chuan mobile leh internet service tih tawp a la ni.