Maharashtra election BJP nena seat insem danah Shiv Sena member lungawi lo

Maharashtra assembly inthlan neih tura BJP leh Shiv Sena an thawkdun leh dawn a, kar kalta khan assembly seat 288-a party seat insem dan tur pawh an puang tawh a ni. Mahse Shiv Sena member eng emaw zat chu seat insem danah lungawi loin nimin khan an bang. 

Assembly seat 288 awmah BJP hian seat 150 a chang dawn a, Shiv Sena tan seat 124 dahin, an thawhpui  party tenau dangte tan seat 14 an dah bawk. Inthlan hi October 21 hian neih a ni ang. Shiv Sena hnena seat pek zatah lungawi loin, nimin khan Shiv Sena corporator 26 leh party worker 300 dawn chuan party chief Uddhav Thackeray hnenah banna an thehlut. 

Party hotu hnena banna an thehluhah hian inthlan huna thil zahthlak tak an hmachhawn lohna turin an bang ta tih an sawi. An party hian BJP nena an thawhdun tur thu puangin, party member-te pawh ṭangrual candidate hi thlawp turin a ngen tih an sawi. Mahse BJP candidate te hi an thlawp ve thei dawn lo tih an sawi. 

Seat insem dan tur hi tihfel a nih hmain Shiv Sena chuan BJP nen hian a inzat insem theih an beisei a, mahse an inbiak hnuah Sena tan hian seat 124 chauh dah a ni ta a ni. Shiv Sena hotu Thackeray chuan BJP nena inremna an siam hnuah an party worker-te hnenah thupha chawiin, seat an chan tlem dawn tak avangin party ticket chang lo pawh eng emaw zat an awm dawn a, heng mite pawh hian party pahnih thawkdunte candidate chu thlawp a, thawhpui turin a ngen a ni. 

Shiv Sena party hminga ticket chang pha lo ṭhenkhat chuan inde­pendent candidate-in inthlan hi chuh zui an tum tho a ni.