Modi-a'n Kashmir chungchangah Inrawlh lo turin Donald Trump a hrilh : Amit Shah

Union home minister Amit Shah chuan prime minister Na­rendra Modi chuan US president Donald Trump hnenah, Kashmir chungchang chu ramchhung thil a ni a, hei vang hian lo inrawlh lo turin a hrilh tih a sawi. 

Nimina Buldhana, Maharash­tra-a election rally neihnaa thu a sawiah Amit Shah chuan, "Hei hi kum tam tak chhunga kan dinna ngai reng a ni a, Kashmir chung­changa rawn inrawlh hi kan ngaizam mai mai dawn lo. Eng ram pawhin Kashmir chungchang sawi an tum chuan ramchhung thil a nih thu kan hrilh zel, America president emaw, midang tu emaw pawh ni se. Prime minister Narendra Modi pawhin chiang takin Kashmir chu ramchhung thil a ni a, a inrawlh a ngaih loh thu a hrilh a ni," a ti. 

Sorkar laipuiin Article 370 a ṭhiah chu engvangin nge an thlawp theih loh tiin NCP leh Congress te a zawt let nghal a, ram aiin politics an dah pawimawh zawk em niin tiin a zawt. J&K-ah firfiakte kutah mi sang tel an thi tawh a, hetichung hian Congress leh NCP chuan Article 370 tihbo chu an dodal tlat niin a sawi. 

Shah chuan Congress senior leader Ghulam Nabi Azad-an Article 370 ṭhiah a nih chuan Kashmir-ah thisen a luan phah ngei dawn a ni tia a sawi chu chhang letin, "Article 370 tihtawp a nih hnu aṭanga tun thlengin thisen far khat pawh a la luang lo," a ti.