Chipko Movement dintu hnenah chawimawina hlan dawn

Environmentalist leh social activist lar, Chipko Movement dintu Chandi Prasad Bhatt chu Indira Gandhi Award for National Integration, 2017-2018 hlan a ni dawn. 

Indira Gandhi Award for National Integration hi Cong­ress party in prime mi­nister hlui hriatrengna atana a siam a ni a, October 31-ah chawimawina hlanna inkhawm hi Jawahar Bhawan-ah buatsaih a ni ang. Tun ṭum hi award an pek 31-na tur a ni. 

Party thuchhuah chuan, Chandi Pradas Bhatt hi hnam inpumkhatna tura a thawh hlawk avangin he chawimawina hi hlan a ni dawn tih a sawi. Award hian chawimawina thuziak bakah pawisa fai cheng nuai 10 a keng tel a, party interim president Sonia Gandhi-in ahlan dawn a ni. 

Kum 85 mi, Bhatt hi Uttarakhand ami a ni a, kum 1964 khan Gopeshwar-ah Dasholi Gram Swarajya Sangh (DGSS) a din a, hei hi Chipo Movement rawn indin chhuahna a ni. Bhatt hian a hnathawh avang hian kum 1982 khan Ramon Magsasay Award a dawng tawh a, kum 2005 ah Padma Bhusan hlan a ni bawk. Hei bakah hian Gandhi Peace Prize pawh pek a lo ni tawh bawk a ni.